ഗ്യാനേഷ് കുമാറിനെതിരായ ജനകീയ കുറ്റവിചാരണ മാറ്റിവെച്ചു; നാളെ നടക്കും

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ‘ഇന്ത്യ’ സഖ്യം ഇന്ന് നടത്താനിരുന്ന ജനകീയ കുറ്റവിചാരണ നാളത്തേക്ക് മാറ്റി. ഡൽഹിയിലെ കനത്ത മഴയും പ്രതികൂല കാലാവസ്ഥയും കണക്കിലെടുത്താണ് തീരുമാനമെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി അറിയിച്ചു. മാറ്റിവെച്ച പരിപാടി ഒക്ടോബർ 31 ശനിയാഴ്ച വൈകീട്ട് നാലിന് നടക്കും.

കനത്ത മഴയെ തുടർന്ന് മുതിർന്ന നേതാക്കൾക്ക് ദീർഘനേരം നിൽക്കാൻ ബുദ്ധിമുട്ടുണ്ടാകുമെന്നതിനാലാണ് പരിപാടി മാറ്റിയതെന്ന് രാഹുൽ വ്യക്തമാക്കി. അതേസമയം, നവംബർ ഒന്നിന് ഡൽഹിയിലെ രാംലീല മൈതാനത്ത് നടത്താനിരിക്കുന്ന ഇന്ത്യ സഖ്യത്തിന്റെ മഹാറാലിയിൽ മാറ്റമില്ല. ജനാധിപത്യം സംരക്ഷിക്കാനുള്ള പോരാട്ടത്തിൽ വൻ ജനപങ്കാളിത്തമുണ്ടാകുമെന്നും രാഹുൽ ഗാന്ധി പറഞ്ഞു.