കേരളത്തിന്റെ നിപ പ്രതിരോധ മാതൃകയെ അപമാനിക്കുന്നു ; ആരോഗ്യമന്ത്രിക്കെതിരെ പിണറായി

നിപ രോഗികൾക്ക് കാലാവധി കഴിഞ്ഞ റെംഡെസിവിർ നൽകിയെന്ന ആരോപണം തള്ളി പ്രതിപക്ഷ നേതാവ് പിണറായി വിജയൻ. ഇത്തരമൊരു വാദം പച്ചക്കള്ളമാണെന്നും ആരോഗ്യമേഖലയുടെ വിശ്വാസ്യത തകർക്കാനുള്ള നീക്കമാണ് നടക്കുന്നതെന്നും അദ്ദേഹം കുറ്റപ്പെടുത്തി. വിവാദത്തിൽ ആരോഗ്യമന്ത്രി പരസ്യമായി മാപ്പ് പറയണമെന്നും ഫേസ്ബുക്ക് പോസ്റ്റിലൂടെ പിണറായി ആവശ്യപ്പെട്ടു.

2023–25 കാലയളവിൽ നിപ ബാധിച്ച 13 പേരിൽ മരിച്ച ആറുപേരിൽ ആരും മെഡിക്കൽ കോളേജിൽനിന്ന് റെംഡെസിവിർ സ്വീകരിച്ചിട്ടില്ലെന്നാണ് പിണറായിയുടെ വാദം. സർക്കാരിന്റെ അനാസ്ഥകളിൽനിന്ന് ജനശ്രദ്ധ തിരിച്ചുവിടാനാണ് നിപ വിഷയത്തിൽ പരിഭ്രാന്തി സൃഷ്ടിക്കുന്നതെന്നും അദ്ദേഹം ആരോപിച്ചു. മന്ത്രിയുടെ പരാമർശങ്ങൾ സിസ്റ്റർ ലിനി ഉൾപ്പെടെയുള്ള ആരോഗ്യപ്രവർത്തകരുടെ സേവനത്തെയും ത്യാഗത്തെയും അപമാനിക്കുന്നതാണെന്നും പിണറായി വിമർശിച്ചു.

കേരളത്തിന്റെ നിപ പ്രതിരോധ സംവിധാനത്തെ അപകീർത്തിപ്പെടുത്തുന്ന സമീപനം അംഗീകരിക്കാനാകില്ലെന്നും ആരോഗ്യമന്ത്രിയുടെ മാപ്പ് ഉറപ്പാക്കാൻ മുഖ്യമന്ത്രി തയ്യാറാകണമെന്നും അദ്ദേഹം ആവശ്യപ്പെട്ടു. അതേസമയം, കാലാവധി കഴിഞ്ഞ മരുന്ന് നൽകിയിട്ടില്ലെന്ന് മുൻ ആരോഗ്യമന്ത്രി കെ.കെ. ശൈലജയും പ്രതികരിച്ചു. 2025 സെപ്റ്റംബർ വരെ മരുന്നിന് കാലാവധിയുണ്ടായിരുന്നുവെന്നും നിപ അതിജീവിച്ചവർക്കുപോലും പിന്നീട് റെംഡെസിവിർ നൽകിയിട്ടില്ലെന്നും ശൈലജ വ്യക്തമാക്കി.